РАЗДЗЕЛ I
АГУЛЬНЫЯ ПАЛАЖЭННІ
Глава 1
Асноўныя палажэнні
Артыкул 1. Задачы заканадаўства аб шлюбе і сям'і Рэспублікі Беларусь
Задачамі заканадаўства аб шлюбе і сям'і Рэспублікі Беларусь з'яўляюцца:
умацаванне сям'і ў Рэспубліцы Беларусь як натуральнай і асноўнай ячэйкі
грамадства на прынцыпах агульначалавечай маралі, недапушчэнне паслаблення і
парушэння сямейных сувязяў;
пабудова сямейных адносін на добраахвотным шлюбным саюзе жанчыны і
мужчыны, роўнасці правоў сужэнцаў у сям'і, на ўзаемным каханні, павазе і
ўзаемадапамозе ўсіх членаў сям'і;
устанаўленне правоў дзяцей і забеспячэнне іх прыярытэту ў адпаведнасці
з гэтым Кодэксам;
устанаўленне правоў і абавязкаў сужэнцаў, бацькоў і іншых членаў сям'і
ў адпаведнасці з палажэннямі Канстытуцыі Рэспублікі Беларусь, нормамі
міжнароднага права;
ахова мацярынства і бацькоўства, законных правоў і інтарэсаў дзяцей,
забеспячэнне спрыяльных умоў для развіцця і станаўлення кожнага дзіцяці.
Артыкул 2. Адносіны, якія рэгулююцца заканадаўствам аб шлюбе і
сям'і Рэспублікі Беларусь
Заканадаўства аб шлюбе і сям'і Рэспублікі Беларусь вызначае парадак
і ўмовы заключэння шлюбу, замацоўвае правы і абавязкі членаў сям'і, рэгулюе
асабістыя немаёмасныя і маёмасныя адносіны, якія ўзнікаюць у сувязі з
усынаўленнем (удачарэннем), апекай і папячыцельствам, іншымі формамі ўладкавання
на выхаванне ў сям'ю дзяцей-сіротаў і дзяцей, якія засталіся без апекі
бацькоў, парадак і ўмовы спынення шлюбу, прызнання яго несапраўдным,
парадак рэгістрацыі актаў цывільнага стану,іншыя сямейныя адносіны.
(У рэдакцыі Закона Рэспублікі Беларусь ад 9 снежня 2004 г. -
Нацыянальны рэестр прававых актаў Рэспублікі Беларусь, 2004 г., № 195, 2/1097.)
Артыкул 3. Абарона сям'і дзяржавай
Сям'я, з'яўляючыся натуральнай і асноўнай ячэйкай грамадства,
знаходзіцца пад абаронай дзяржавы.
Дзяржава выказвае клопат аб сям'і шляхам стварэння ўмоў для эканамічнай
самастойнасці і росту дабрабыту сям'і,
ільготнай падатковай палітыкі, выплаты дзяржаўных дапамог сем'ям, якія маюць
дзяцей, ільготнага крэдытавання, стварэння і развіцця шырокай сеткі дзіцячых
і медыцынскіх устаноў, стварэння ўмоў для спалучэння бацькамі працоўнай дзейнасці
з выкананнем сямейных абавязкаў, развіцця інфраструктуры побыту.
Выхаванне дзяцей і вядзенне хатняй гаспадаркі прызнаецца грамадска
карыснай працай.
У сферы сацыяльнай палітыкі дзяржава лічыць прыярытэтнай задачай абарону
шлюбу, сям'і, ахову мацярынства, бацькоўства і дзяцінства.
Артыкул 4. Прававое рэгуляванне шлюбных і сямейных адносін дзяржавай
Прызнаецца толькі шлюб, заключаны ў дзяржаўных органах, якія рэгіструюць
акты цывільнага стану.
Рэлігійныя абрады, якія тычацца пытанняў шлюбу і сям'і, прававога значэння
не маюць.
Гэтае правіла не распаўсюджваецца на здзейсненыя да ўтварэння ці аднаўлення
ўпаўнаважаных на тое органаў запісу актаў цывільнага стану рэлігійныя абрады
і атрыманыя ў іх пацверджанне дакументы аб нараджэнні, заключэнні шлюбу,
скасаванні шлюбу і смерці.
Артыкул 5. Ажыццяўленне правоў, якія вынікаюць са шлюбных і сямейных
адносін
Правы, якія вынікаюць са шлюбных і сямейных адносін, ахоўваюцца законам,
за выключэннем тых выпадкаў, калі гэтыя правы здяйсняюцца ў супярэчнасці з іх
прызначэннем.
Ажыццяўленне правоў, якія вынікаюць са шлюбных і сямейных адносін, не
павінна парушаць правы і законных інтарэсы іншых грамадзян, наносіць шкоду
інтарэсам грамадства і дзяржавы.
Артыкул 6. Абарона правоў, якія вынікаюць са шлюбных і сямейных адносін
Абарона правоў, якія вынікаюць са шлюбных і сямейных адносін, здзяйсняецца
судом, органамі апекі і папячыцельства, а таксама дзяржаўнымі органамі, якія
рэгіструюць акты цывільнага стану.
У межах, прадугледжаных заканадаўствам, дапушчаецца самаабарона правоў,
якія вынікаюць са шлюбных і сямейных адносін.
Артыкул 7. Заканадаўства аб шлюбе і сям'і Рэспублікі Беларусь
Заканадаўства аб шлюбе і сям'і Рэспублікі Беларусь засноўваецца на
Канстытуцыі Рэспублікі Беларусь і складаецца з гэтага Кодэкса і іншых актаў
заканадаўства.
Цывільнае, жыллёвае і іншае заканадаўства прымяняецца да сямейных адносін
толькі ў выпадку адсутнасці рэгулявання гэтых адносін заканадаўствам аб шлюбе і сям'і.
Міністэрствы і іншыя рэспубліканскія органы дзяржаўнага кіравання могуць выдаваць
нарматыўныя прававыя акты па пытаннях, якія тычацца шлюбных і сямейных адносін,
у выпадках і межах, прадугледжаных гэтым Кодэксам і іншымі актамі заканадаўства.
|